Според претходните податоци на Државниот завод за статистика, деловните субјекти, во рамките на
структурните деловни статистики, во 2016 година реализираа 3.0% поголем промет и 7.0% зголемена додадена
вредност во однос на претходната година.
55 308 предоминатно пазарно ориентирани деловни субјекти со ангажирани 375 129 вработени лица остварија
вкупен промет од 1 107 197 милиони денари и додадена вредност од 246 489 милиони денари.
Најголемиот дел од претпријатија му припаѓаат на секторот Трговија на големо и на мало (41.0%), во кој со
ангажирани 26.0% од вкупно вработените и се реализира 42.9% од вкупниот промет, односно 24.0% од
вкупната додадена вредност.
Најголем дел од вработените се ангажирани во секторот Преработувачка индустрија - 30.6%, во кој се создава
26.4% од вкупната додадена вредност. Значително учество во додадената вредност имаат и секторите
Градежништво 11.1%, Транспорт и складирање 8.6% и Снабдување со електрична енергија, гас и пареа 7.1%.
Микропретпријатијата со помалку од 10 вработени доминираат (90.3%), речиси половината од нив се од
областа на трговијата. Со ангажирани 32.8% од вкупно вработените, создале 22.0% од вкупната додадена
вредност. Од друга страна, во големите претпријатија (0.3%), главно од секторот Преработувачка индустрија,
се ангажирани 24.1% од вкупниот број вработени, со остварени 34.2% од вкупната додадена вредност во
рамките на деловниот сектор.
